Phuahtu : Laltanpuia

Awmhar champion val kan ni vangkhawpui lal lai par tlan,

Kan hmatiang i sawn zel ang aw, sakhming khuavel than nan;

Lunglenah rual khum zelin hmangaih ram i sirsawn ang,

Duh leh relthang chu zing ang hmiang,

Kan tan piallei hi van pialral ang.

Awmhar champion zaleng lungduh rual,

Dawn tam pawl siam kan ni

Kan 'doctrine' hi vanhnuai khawvel ramah a chungnung ber,

Duh leh relthang chu zing ang hmiang,

Thuhnuairawlh lei ro chan tum kan ni.

Awmhar champion val kan ni, tah chang ni zawng tam mahse,

Suihlungruala kan len nan turnipui, lo eng tawh la,

Tah khua tisei mai lo hian lenlai chen i uar zawk ang;

Duh leh relthang chu zing ang hmiang,

Khawtlangpui awitu zaleng kan ni.

Awmhar champion val kan ni kan duai bil lo rual tawnah

Kan sakhming hi khuavelah, chhim leh hmarah thang chhuak se,

Lunglai timawl lote hian Baiksailovi rim mah la,

Duh leh relthang chu zing ang hmiang,

Khawvel kan ta lo ni bil hlei lo.

Kumtluang ar ang min vaihtir vangkhawpui a zau thlawn e,

Kan chan tawka khuanu rel ralkhat hmel hmuh mah ni se,

Par ang a chul lo'ng a sakhming zai tin a chuang tawh hnu;

Chhimtlang lelte i tawh changin

Min han biak ang che biahzai nemin.